Kókshetaý qalasynda Qazaqstan men Reseıdiń kásibı jáne áýesqoı avtosportshylarynyń basyn qosqan alǵashqy tehnıkalyq jarys ótti. Osyndaǵy Qopa kólinde «Samuryq-2018» atty kezekti qysqy sprınt-rallıden Qazaqstan kýbogynyń III kezeńin ótkizý barysyn 5 myńǵa tarta kókshetaýlyq jankúıer tamashalady.
Jarys jolyna Astana, Petropavl, Qaraǵandy, Pavlodar, Kókshetaý jáne Almaty óńirlerinen kelgen 32 komanda shyqty. О́kinishke qaraı reseılik ekıpaj tehnıkalyq sebepterge baılanysty atalǵan dodaǵa túse almady. Atalǵan sporttyq sharanyń ótýine Ramıl Nabıýlın jetekshilik etetin «Kókshetaý Avtosporty» qoǵamdastyǵy muryndyq boldy. Nabıýlınniń sózine qaraǵanda, mundaı sharany ótkizýge Aqmola deneshynyqtyrý jáne sport basqarmasy men osyndaǵy «Zapchastı №1» servıstik bazasy belsendi qoldaý kórsetipti.
Temir tulpar minip, jelmen jarysyp jurttyń delebesin qozdyrý ekiniń biriniń qolynan kele bermes sharýa. Ásirese qar men muzdyń ústinde avtokólik júrgizýdiń ózindik mashaqattary taǵy bar. Máselen, kúrdeli sanalatyn 60 shaqyrymdyq qashyqtyqty baǵyndyrý tehnıkany ǵana emes, sonymen birge rýlde otyrǵan júrgizýshiniń de temirdeı minezine salmaq salatyny aıtpasa da túsinikti. Osy turǵydan kelgende árbir ekıpaj kásibı sapalyq deńgeıin dáleldep, myqtylyq pen jeńiske degen qulshynysyn kórsete bildi. Nátıjesinde, Astananyń «Pegas» komandasy birinshi orynǵa ıe boldy. Ekinshi orynǵa «Kókshetaý WINKOD» komandasy qol jetkizse, úshinshi oryndy pavlodarlyqtar ıelendi.
Asqar TURAPBAIULY, «Egemen Qazaqstan»
Aqmola oblysy